ستاير النسيان

بيقولوا النسيان نعمه ....صحيح... بس انهى نسيان بالظبط.... علشان الى انا فيه ده اكيد نقمه او ابتلاء ....انا بقيت بنسى كل حاجه و اى حاجة بقت حالتى مستعصيه جدا ....بدا الموضوع معايا من كام سنه كده كنت بنسى حاجات بسيطه ...انسى نضاره الشمس ..انسى اجيب جاكت ..انسى اطفى نور المطبخ ...حاجات كده على خفيف ...لكن يوم عن يوم الموضوع ابتدى  يكبر و بقى منظرى وحششششششششششششششش قدام اهلى و اصحابى و المجتمع و الناس...

لكن مع الوقت الواحد بيتاقلم و يبقى شئ عادى ميزعلش يعنى انا عن نفسى معدش بيزعلنى ...و حاولت اتغلب عليه مثلا انى اكتب علشان منساش ...يعنى اكتب الى انا عايزاه من السوبر ماركت فى ورقه و احطها على التلاجه على فكره بتنفع جدا الحكايه دى لو افتكرت اخدها من على التلاجه

او انك ترجع الاوده علشان تفتكر انت كنت عايز ايه من المطبخ ساعات بتنفع بعد المره  25 الف و ساعات بتفتكر لما تقوم من النوم و انت حتموت من الجوع يعنى الواحد بتصرف ... و علشان الواحد ميتاخرش على مواعيده بحط هامش وقت للنسيان ودى بتكون الساعه الى بفتح الباب فيها 20 الف مره قبل ما انزل علشان اتاكد انى قفلت الغاز .. و الشباك ..موتور المايه... و 15 الف مره الى بطلع تانى و افتح الباب علشان نسيت موبايلى ...و اطلع تانى علشان اتاكد انى قفلت الباب كويس و بعدين اركب العربيه و انزل علشان مش لاقيه نضارتى و اقعد ادور و انا على التليفون بشتكى لصاحبتى انى على طول بدور على حاجتى ادينى اهو بكلمك و انا بدور على النضاره و ادى الموبايل كمان مش فى الشنطه ...طبعا مش فى الشنطه لانى بتكلم فيه و النضاره على خلقتى كالعاده بس المشكله ان الموضوع ده بيحطنى فى مواقف محرجه جدا ..

مرة كنت فى سيتى سنتر او ما  يسمونه البعض كارفور و ده الماكن الى فى اسكندريه لو واحشك  حد اوى  تاخد بعضك و تطلع على هناك حتشوفه ان شاء الله  من غير معاد ولا حاجه ساعات لما امى توحشنى و معنديش وقت اعدى عليها اقوم رايحه على هناك و اضرب عصفورين بحجر اعمل الشوبنج بتاعى و اخبط فيها بالمرة ...المهم مرة و انا هناك قابلت واحده وشها مش غريب عليا و انا من عادتى مطننش و لا ادور وشى ابدا حتى لو مش فاكره الشخص ده منين.... من وجهة نظرى ان ده اذوق من انى ادور وشى و اعمل عبيطه .... دايما اهجم وامد ايدى و اقول " انا فلانه انا عارفاكى " عملت كده فعلا... ردت "انا عارفاكى كويس بس يظهر ان انتى الى مش فاكرانى "رديت ببعض الارتباك " لا طبعا فكراكى بس السن بقى و الزاهايمر اصل انا خايبه اوى فى موضوع الاسماء " قالتلى انا دعاء "و سكتت و انا فى سرى بقول متكملى جميلك يا شابه و تقوليلى انا اعرفك منين .... ابتسمت و قلت بشئ من البلاهه "دعاء ازيك حبيبتى اخبارك ايه " ردت و ابتدى وشها يتغير " انت مش فاكرانى مش كده ؟؟؟" قلتلها و انا فى غايه الارتباك " ياااااااااااااااا هى ايام المدرسه دى تتنسى احلى ايام يا ريتها تعود" بدا على وشها علامات الانزعاج و قالتلى "بس انا مكنتش معاكى فى المدرسة انت رحتى لبعيد اوى" ابتديت اعرق و ارتبك زياده و قلت لنفسى بعيد اوى يبقى هو الشغل مفيش غيره  رحت رده" لا ده انا خلاص بقيت بنسى بشكل ...فين ايام الشغل كانت احلى ايام يارتها تعود " ابتدى يظهر عليها علامات الغضب و العصبيه و قالتلى " احنا عمرنا مشتغلنا مع بعض ده انتى مش فاكرانى خالص " اضطريت بعد المواجهه دى اعترف على كل اعضاء المنظمه و قلتلها لا مش فاكرة قالت فى غضب شديد" انا كنت معاك قى الجامعه " ابتسمت ابتسامه بخوف و قلتلها معلش اصل الدفعه بتاعتنا كانت كبير بس حصل خير كانت احلى ايام و الله يارتها تعود " بس هيهات انها ترحمنى ردت بمنتهى الحده " اولا دفعتكم كانت 300 بنت بس يعنى مش كتير و انا كنت فى دفعه اصغر منك بسنتين " هى قالت كده و انا عينك متشوف الا النور و قلت " يعنى كان يجرى ايه لو قلتى الكلمتين دول من الاول ...و كمان مش دفعتى و عايزانى افتكرك بعد عشرين سنه ده انا من كتر حمقتك افتكرت ان احنا راضعين على بعض ...حاجه تقرف تندمو الواحد انه بسلم على حد اووف" مسكت نفسى انى مسفخهاش قلم على وشها و ادورت و مشيت و الناس كلها بتتفرح على  ,,, يعنى دفعه اصغر منى بسنتين و عايزانى افتكرها بعد متخرجنا بعشرين سنه ده ايه الهم ده ... انا شايفه انه من الذوق انى اعرف الناس على نفسى علشان لا احرج و لا احرج حد " انا فلانه كنت معاكى فى الكليه" كان يجرى ايه لو كانت قالت الكلمتين دول ووفرت عليا و على نفسها الاحراج و حرقة الدم ...هى الناس بقت عامله كده ليه ؟؟

روحت و انا فى منتها التوتر و الغضب و قلت انا لازم انعش ذاكرتى شويه لحسن كده مينفعش ...جاتلى امانى صحبيتى الانتيخ ...امانى صحبتى و جارتى من ايام المدرسه دمها زى العسل لاكن خلقها ضيق و متحبش تشغل مخها كتير فبتجيب من الاخر ...يعنى مثلا لو اشتكتلها من جوزك ...الرد حيكون "اطلبى الطلاق" لو اشتكيت من شغلك الرد حيكون"استقيل" لو الشكوى من الاولاد يبقى"وديهم ملجأ "و هكذا حكتلها على الى حصل ابختصار بصتلى من فوق لتحت و قالتلى "متبقيش تسلمى على حد"

جبت شويه صور بتاعت المدرسة و قلتلها تعالى نتفرج كده على الصور و نعيد الذكريات ...كل ما اسالها على حد تقولى مش فكراه ....طب مين دى يا امانى  تقلى معرفهاش خالص فضلنا كده يجى ساعه و اخر ما زهقت منى قالتلى ده اصلا مش الفصل بتاعنا.... فضلت انى امشى مع كلمها و اوهم نفسى ان وجودنا فى الصورة كان بمحض الصدفه ...يعنى كنا مثلا بنتمشى فى الحوش قمنا لقينا فصل بيتصور امنا ريحين متصورين معاهم غتاته....مش احسن ما احس ان انا رايحه فى ستين داهيه و ضايعه مش قادرة افتكر زمايل الدراسه ...بس حسيت ببعض الراحه انى مش لوحدى الى كده

و قعدت اسال نفسى هو فعلا النسيان نعمه و انهى نسيان الى نعمه ....انى انسى حب قديم مثلا و اكمل حياتى ...انى انسى القسيه ...انى انسى الحزن على عزيز فقدته ....انى انسى ايام صعبه مرت ...و هل فى نسيان نقمه؟؟؟ ...نسيان الواجب و العدل و حق الغير و نسيان الفقير و المحتاج ... نسيان الضمير مفتكرش ان ده نعمه

امتى ستار لنسيان تكون نعمه و امتى تكون نقمه؟؟

ام سومى 

من الكنبه الى السرير

انا حزب كنبه.. من اول يوم فى الثورة وانا على الكنبه...انا من الناس الى مكنتش فاهمة ايه الى بيحصل فى التحرير و قالت ادوا الراجل فرصة ... انا من الناس الى لما فهمت ثارت من على الكنبه و شجبت و نددت و هتفت من على الكنبة....فى السنه و نصف الاخيرة دى نشأت بينى و بين الكنبه علاقة وطيده جدا ...حياتى كلها اصبحت على الكنبه باكل و بشرب على الكنبه وبنام على الكنبه ....حتى يوم الانتخابات سبت الكنبه على عينى و روحت انتخبت و رجعتلها زى العاشق الولهان الى افتقد حبيبته ...لكن زى اى قصه حب بتتغير مع الزمن و الظروف ...اول ما نتيجة الانتخابات ظهرت و كانت الاعاده بين الفريق شفيق و الدكتور مرسى اصبت بخيبه امل شديده و ابتديت ابعد عن كنبتى ...ابتدت العلاقه تسوء يوم بعد يوم و لما نتيجة الانتخابات ظهرت كانت دى القشه الى خلتنى انتقل من الكنيه للسرير ...و من يومها و علاقتى بكنبتى متوترة جدا

اخدت اللاب توب بتاعى و بعض اصدقاء السوء دلونى على سكه المسلسلات التركى و انا الى كنت بقول استحاله مش ممكن حعمل كده ابدا لكن بعد كام حلقه اصبحت من مدمنى المسلسالات التركى و قررت انى اتطلق و ابعت بنتى ملجأ و اتفرغ للمسلسلات التركى و بلا سياسه بلا وجع قلب ...."احذر الحلقة الاولى"

بس كنت كل حين و اخر ياخدنى الحنين الى الكنبه اشوف خبر كده على الماشى اشوف فيديو على الفيس بوك يعنى من باب التغير...و فى يوم كنت فى طريقى الى المطبخ بضرب عينى كده على الكنبه لقيت ام محمد الست الى بتنضفلى عامله كوبايه شاى و فاتحه التليفزيون و مركزة اوى و هى مبتركزش كده اوى لا اذا كان مسلسل ممل او برنامج طبيخ ...ببص فى التيليفزيون لقيته حديث للدكتور مرسى...رجعت خطوتين و بصتلها باستغراب و قلتلها "بتعملى ايه يا ام محمد ؟؟"

قالتلى" بتفرج على الحج الرئيس مرسى يا مدام و الهى الراجل ده كويس بس محدش فاهمه"قلتلها "و انتى بقى الى فاهماه يا ام العوريف"ردت "كفايه يا مدام انه حافظ كتاب ربنا و بيصلى فى الجامع ومربى دقنه"قلتلها "انتى شايفه ان ده كفايه ؟؟"قالت " ده راجل طيب و مننا صحيح من شويه كان بيوصف كده طريقه عمل طير كده و بيقول ان ريشه ريش نعام و جناحات كبيره و مؤخرة مدرك ايه مش المؤخرة دى هى لمواخزة الزلمكه يا مدام ....و اسمه معرفش ايه كده...رديت عليها بابتسامه ممزوجه بخيبه امل "طائر النهضه""ايوه صح الله ينور عليكى و كان لسه حيقول المقادير و الطريقة روحتى حضرتك داخله "و زمنها بتقول فى سرها دخلتى زى القضا المستعجلرديت عليها و قلتلها "متقلقيش خالص الطبيخ الايام الى جايه كتير اوى"

التزمت السرير و المسلسلات التركى و زيارات خفيفه كده للكنبه ...و فى يوم قلت لنفسى اكيد حتحصل اى انجازات فى فترة ال100 يوم دى الراجل وعد ... و جه اليوم الى كل مصر مستنياه ...خبر عاجل "سيشهد التاريخ ان المانجه فى عصره بقت ب 3 جنيه"كلمت اصحابى فى التليفون "سمعتوا الى انا سمعته الريس بيقول المانجه ب 3 جنيه " .."معقول 3 جنيه بس ""اه و اللهى انا سمعت الريس بذات نفسه بيقول كده"كلمت ماما و قلتلها"حضرى نفسك حعدى عليكى نروح السوق نجيب مانجه ""مانجه ليه ؟؟" اسكتى يا امى دى المانجه بقت ب 3 جنيه ده باين علينا حننهض"رحت لامى و خدتها و روحنا السوق وقفت عند بتاع المانجه و قلتله لو سمحت عايزة 30 كيلو و لا اقولك خليهم 40 "بصيت لامى لقيتها باصالى باستغرابضحكت و قلتلها" اصلى عايزة اجرب مخلل المانجه بيقولو حلو"وطيت عليها و قلتلها "يا امى دى ب 3 جنيه الكيلو يعنى 120 جنيه و يبقى عندك مانجه طول السنه "ردت عليا "متاكده؟ "قلت "طبعا يا امى" ....ماما قالت للراجل و انا حاخد 20 كيلوالراجل كان فرحان فرحه الاهبل و انا اقول فى سرى الراجل ده عبيط و لا ايه امال لو كان بيبيع طماطم كان عمل ايه دى حاياله مانجهنقينا المانجه و حطيناها فى العربيه و و طلعت الفلوس و اديتها للراجل ...و ادورت امشى لقيته بينادى عليا"يا مدام يا مدام ايه ده؟؟" ...قلتله "تمن المانجه"قالى "180 جنيه حضرتك واخده 50 كيلو يعنى الحساب 700 ""700 ايه ..جنيه " ...رد الراجل اه يا مدام 50 فى 14 يبقى 700"انت بتستعبط يا راجل انت ده كيلو المانجه ب 3 جنيه فى كل حته "فين ده يا مدام جبتى الكلام ده منينلا ده انت بقى عايز تروح فى داهيه انا حبلغ عنك مباحث التموين لا لا حبلغ عنك البوليس لا لا ده انا حكلم رياسه الجمهوريه ده انت خلاص دست فى الحللو فى ذهول الحاضرين ابتديت اصرخ "ده انا حوديك فى داهيه ده انت حتروح ورا الشمس "الناس قعدت تهدينى رمتله الفلوس و انا بتوعدله بمستقبل مظلم و مشيتدخلت العربيه و مشيت وصلت امى فى صمت تام و انا فى الطريق واحده صاحبتى كلمتنى"شوفتى الفيديو الى على اليوتيوب ""فيديو ايه"ست مجنونه ضرب بياع غلبان انهارده فى السوق""معقول ؟؟؟ " سالتها و انا فى رعب انى اتفضحتاه و الله انا شفت الفيديو بنفسى " ابتديت احس بضربات قلب سريعه و رعشه انا خلاص اتفضحت و انا عمله نفسى قمع وسط اصحابى"و الله ؟؟؟ شكلها ايه ؟؟؟"مش باينه بس يظهر عليها مجنونه"تنفست الصعداءو قلتلها "المجانين فى نعيم" و كنت اعنيها على الاقل مش حاسين بالهم الى احنا فيه ......و بعد كده جالى يجى 10 تليفونات تحكيلى على الفيديو الى على اليوتيوب للست المجنونه الى اتخنقت مع الراجل بتاع المانجه

روحت و معايا المانجه و من غلى حطيت سبت المانجه قدامى و قعدت اكل لحد ما اغمى عليا و لما فقت فى المستشفى دخل الدكتور و قال لجوزى ان المدام ان شاء الله بقت كويسه عملنلها غسيل مانجه ...قصدى غسيل معده و ممكن تروح روحت و جوزى عمال يحسبن طول الطريق على مصروف البيت الى اتصرف فى المانجه و انا مش عارفه افتح بقى بنص كلمهرجعت على السرير و انا منهكه القوى و مش طايقه اى حاجه تمت للمانجه بصلهومن حوادث قطارات و مؤامرات ...و تصريحات رئيس الوزراء عن اقتصاد بينهار بس الدنيا زى الفل و اخر حلاوة الى ان اسباب الاسهال الرضاعه الطبيعيه ... و ما بين مظهارات و مليونيات و شباب بيموت و بيتصاب من غير نتيجه...و رئيس مصدر الطرشه و بيعمل ميكسات عربى و انجليزى و فضايح دوليه ....و تعذيب و قتل للثوار و ....و....و.....

علاقتى بالكنبه ازدادت سوء و بقيت امضى وقتى كله على السرير حاله من الاحباط و الكأبه لا تنتهى و فاضل لى تكه و ابقى ادمن فى صفحه انا اسف يا ريس ..... مبيخرجنيش من كل ده غير المسلسلات التركى ربنا يخلى كريم و سليمان احب اقولهم ان هما و شكولاته جالكسى الى مخلينا نستحمل القرف الى احنا فيه ده

نقلتو الناس من الكنبه على السرير **** لعاد يهم مين ريس و لا مين يجى وزيرتجيبوا مرشد و لا شاطر تشيلو المشير **** تقولوا امن و امان و فكل مكان غفيرو بدل العيش المقدد خلاص حناكل فطير ****و لسان عصفور فى محشى و المانجه بقت عصيردى مصر بقت نجيله و الى بياكل حمير *****نقول تعبنا و الله لقد هلك البعيريقولوا خلاص حننهض خلوا الطائر يطير****و بعد الف ليله وقعنا فى اوطى بيرعايزين حق الشهيد و خليه طلب اخير ****يقولك ده المسامح و الى بغفر كبيرمش قلتلك يا صاحبى بتنفخ فى النفير ****شعبك يا مصر انتخ و بيشخر شخير

(ام سومي)

يخرب بيت الفلانتين الى موقع الناس فى بعتيها

صحيت من النوم و كعادتى مؤخرا افتح عنيه على الفيس بوك و اشوف ايه الاخبار... قبل غسيل الوش و القهوة و  

كالعاده فى الايام الغامقه الى احنا فيها لقيت الفيس بوك كله جراح و عذاب و اهات و حنين .... ايه النكد الصباحى ده ؟؟؟و الحقيقه ان النكد ده مكنش سببه احوال البلد كالمعتاد لا ابدا كان سببه ..... الفلانتين "عيد الحب "بلغه الفرنجه .....

الكل -واخص بالذكر هنا الستات- بيتكلم عن الجرح و العذاب و الاحباط و الوحده فى عيد الحب يا نهار ابيض امال فى ذكرى النكسه نتكلم عن ايه؟؟؟؟ عن غزل البنات؟؟!! لملمت جراحى و قمت عملت فنجان القهوة و قعدت افكر ....

هو ليه الحب اخد الشكل المحزن ده ؟؟؟ و انا لسه بفكر فى الاسباب رن جرس التليفون و قطع حبل افكارى دى دعاء صحبتى

انا :"الو حبيبتى ازيك وحشتينى "

دعاء :"اخبارك ايه جهزتى نفسك ؟؟"

انا:" عشان ايه حبيبتى "

د:الفلانتين عيد الحب يعنى"

انا " انا عارفه انه عيد الحب يعنى بس الواحد بيجهزله ازى ده"

د:"بصى يا ستى انا عامله نفسى عبيطه و مش واخده بالى خالص و يوم الفلانتين حبعت اجيب عشا من بره و اسرب العيال عند ماما و شموع بقى و حركات و اعمله مفاجأه  ........بس لو شريف مفتكرش زى كل سنه و مجبليش هديه وورد يوميها ... حطين عيشته ده انا السنه دى مستحلفاله "

انا :"دى كده تبقى مفاجأه ؟؟؟!!! ده اسمه كمين يا ماما بدام هو بينسى كل سنه متفكريه متخديش الراجل على خوانه "

د:" لا اسكتى اصله فارسنى و معصبنى اليومين دول "

سكت ... و عرفت انه كمين مدبر صعب على الراجل لدرجه انى فكرت اكلمه احذره... يلا كل واحد باخد نصيبه يا عينى يا شريف يا خويا و الله كان راجل كمل ...خد الشر و راح

قفلت مع دعاء و قلت لنفسى يمكن علشان دعاء و شريف متجوزين من زمان و فى ظل ضغوط الحياة و الرتم السريع الى احنا عايشين فيه بيتوه الحب فى النص و....... يووووووووووووووووووووه جرس الباب يا ترى مين

دى سلمى جارتى اصغر من كده بحبه و شويه.... متجوزه جديد مكملتش سنه و من اول يوم وصلت العماره ضربت معايا صحوبيه ...حاولت تقلى يا طنط بس انا وقفتها عند حدها و من يومها و هى منطقتهاش تانى

سلمى و كريم متجوزين عن حب و جيل تانى غيرى خالص ...بحبها علشان بتحسسنى انى شباب و ديما تلجالى لما يحصلها مشكله او تكون عايزه وصفه اكله ....و بوصفه اكله دى اعنى مقادير الرز ؟؟ اسلق فرخه ازى ؟؟ احط على السلطه ايه ؟؟؟ كده يعنى

لقتنى بقولها "حتعملى بكره ايه يا سلومه "

س:" فى ايه"

انا " الفلانتين "

س:" لا ابدا كنا حنروح انا و كريم السينما بس قلنا نقعد فى البيت نتفرج على فيلم علشان انتى عارفه كريم بيشتغل الجمعه مهو علشان كده انا جتلك عايزه مقادير الفيشار "

انا" مقادير الفيشار !!!! حاضر عنيا ...قوليلى يا سلمى كريم جابلك هديه؟؟ علشان عيد الحب؟؟

"س:" هديه ايه بس لا اصل احنا بنحوش علشان نطلع ماليزيا "

خدت سلمى مقادير الفشار وانا قعدت افكر الله ماهى سلمى لسه متجوزه اهو و شابه صغيره اما مش بيحتفلو ليه الجيل الجديد ده فقد معنى الحب و الرومانسيه و بقوا عمليين اوى كده ليه ....يعنى الموضوع ملهوش دعوه بمده الجواز و لا اذا كان عن حب و لا صالونات ....و انا بفكر ببص فى الساعه لقيت معاد خروج بنتى من المدرسه قرب لبست و نزلت بسرعه و الحمد لله لقيت تاكسى على طول ... كان السواق شاب و كان مشغول فى مكالمه تليفون و كان واضح عليه انه متعصب جدا ...و لشده الزحام و صوته العالى عرف القصه

"قال عيد الحب قال انا الى اعرفه العيد الصغير و العيد الكبير ...اه انا قلتلها بلا عيد حب بلا كلام فارغ هو انا لاقى اكل لما حجبلها هديه كمان فى عيد الحب ....النسوان اتخبلت فى مخها خلاص ...لف و قالى لموأخزه يا مدام اصل البت خطبتى دى مخها فاضى ....معناش تنجوز و شغال زى الحمار علشان نلحق ندخل على العيد و دى تقلى عيد الحب قال  فدبيت معاها خناقه و حلفت عليها لو جابت سيره الموضوع ده تانى لفسخ الخطوبه..." ثم عيد الحب اصلا حرام 

انا :"صلى على النبى يسطى و روق و بص قدامك الله يخليك "

"فورت دمى الله يفور دمها لمؤخزه يا مدام دوشتك"

هو احنا ليه بنقصر عيد الحب على الرجاله الزوج الخطيب الحبيب ...هو احنا ليه ربطنا عيد الحب بالشموع و الهديه ؟؟؟هو

احنا ليه حددنا له يوم معين ؟؟؟ ليه كلكعنا الموضوع كده ؟؟؟

الموضوع بسيط حب كل الناس الى بيحبوك ..عبرلهم عن حبك فى اى يوم و فى اى وقت ..حب امك و اسال عليها كل يوم حب ابوك و مر عليه كل يومين تلاته فى شغله ... ابعتى لجوزك رساله قوليله وحشتى تاكل ايه النهارده حيقولك اى حاجه- بس مش مهم ...كلم صاحبك و قله تعاله نشرب فنجان قهوة فى اى حته ....حب بلدك و حافظ عليها ...حب اخواتك و قاريبك وودهم ...حب الغلابه و اعطف عليهم

هو ده الحب فى نظرى .. و كل يوم تقدر تعمل فيه ده يبقى عيد

علشان كده انا قلت اخد جوزى و نتعشى بره ....و فى نص الطريق اتخنقنا و رجعنا البيت علشان كالعاده "تروحى فين " "اى حته مش فارقه " " لا قولى انا كمان مش فارقه معايا " لا قول انت لا قولى انتى و قامت الخناقه و رجعنا البيت

شريف وقع فى الكمين و دعاء لحد دلوقتى مسوده عيشته

سلمى اتخنقت مع كريم علشان لقيت رساله حب على تليفونه و هو يحلف يمين عظيم انها واحده كانت معاه فى المدرسه و متجوزه و مفيش بينه و بينها حاجه و هى تحلف ميت يمين انها حتلم هدمها و تروح على بيت ابوها ...اما  سواق التاكسى مع انه عشره معرفش عمل ايه مع خطيبته كان لازم اخد تليفونه و اطمن

يخرب بيت الفلانتين الى موقع الناس فى بعتيها يا جدعان

 ام سومى

حتنتخب مين؟؟؟؟

سؤال بيتسال 5 الاف مره فى اليوم ..من كل حد ..و من اى حد ..من ساعة ماتصحى لحد ما تنام ....و كل واحد عنده راى مختلف ..اللطيف فى الموضوع انى كالعادة بتاثر بكلام الناس ...مفيش شخصية بعيد عنكم ..بغير راى 50 الف مره فى الفمتو ثانيه ...عادى انا ست و من حقى اغير راى

اصحى الصبح على تليفون ...الو ازيك انتى نايمة و لا ايه ...لسه حرد تقولى انتى حتنتخبى مين ...ارد اقول لسة مش مقررة ...تقولى طيب كويس اصل مفيش غير فلان ..ده الى حيظبط البلد راجل محترم و جامد و حيحط الفأران فى جحرها غير انه شيك ده عليه شوية بلوفرات و بصراحة انا نفسى اجوزه اختى اصله وحدانى ...ده كفاية المطار و مصر للالبان قصدى للطيران ..

ارد و انا ما بين الصحيان و النوم طيب حاضر حفكر ...لا متفكريش هو ده الحل الوحيد احنا زهقنا خلاص

افكر فى كلام صحبتى و اقول من ناحيه انه شيك فهو شيك ...و الست عايزة تستر اختها يعنى اقف فى طريقها ...ثم فعلا المطار مميز عامل زى المتاهه... و ده بيسلى المسافر اهو يتوه و يتهد فلما يطلع الطيارة يتخمد و ميحسش بالسكة ...الكراسى مكسره و كلها مايله على جنب و ده بيعمل جو من الالفة بين المسافرين... كل مسافر نايم على كتف الى جانبة ...العاملين فى المطار لا يمكن ان ترى اى ابتسامة مرسومة على وجههم ...دليل على الجدية و الاخلاص فى العمل و هو منها الى مسافر ميترحمش على البلد و يخففوا من معاناته بالغربة ...كل المطارات تعتمد على حاسة النظر فى التعرف على الاماكن تبص على اليافطة و تروح المكان الى انت عايزة...المطار عندنا يعتمد على حواس تانية خالص.. حاسة الشم مثلا ... فيمكنك التعرف على مكان الحمام بمجرد دخولك المطار بتتبع الرائحة و ليس السهم

اما مصر للالبان قصدى للطيران  ...حدث و لا حرج انا قعدت سناتين بسافر كل شهر تقريبا عمرى مركبت الطيارة فى معدها ابدا ..وده خلى عندى "قاعدة عريضة" من الاصدقاء فى جميع انحاء العالم ..ما انا كنت بقعد فى المطار بالساعات ...فعلا هو ده الحل الوحيد هو مفيش غيرة

انزل اوصل بنتى للحضانة تقبلنى واحدة من اولياء الامور و تسال السؤال المعتاد حتنتخبى مين اقول فلان ...يا نهار ابيض ...انتى بتتكلمى جد ؟؟؟ ده فلول ... اتلخم و ابرطم و اتهته و اقولها قولى و المصحف ...و وابور يهب فيا حرام عليكى انتم ايه مبيصعبش عليكى اهالى الشهداء ...حسبى الله و نعم الوكيل ...عليه العوض و منه العوض ضاعت الثورة ...طب يا ستى يهديكى يرضيكى طب تحبى انتخب مين ...فلان هو مفيش غيرة ...اقولها بس بيقولوا عليه اخوان ...كان كان انتى مبتقريش ...الراجل انشق عنهم

اقول هو حقيقة راجل محترم ان شاء الله افكر ...تفكرى ..تفكرى ليه؟؟ هو مفيش غيرة

تدخل الست الى بتنضفلى ...المرة دى انا بقى الى اسال مش معقول كده ...قوليلى يا ام محمد حتنتخبى مين ....فلان يا مدام عايزين نستقر ...راجل عارف البلد ماشية ازاى و خبرة و عارف خبايا البلد ..و حيصلح علاقاتنا مع البلاد الى حولينا ...ابصلها و انا فى سرى بقول هى علاقتنا بالدول المجاورة فى خطر و انا معرفش و ام محمد و صلها الخبر منين ....يظهر و الله اعلم ام محمد بيتعمل فيها زى الى بيتعمل فيا ...و تدور هى و تسالنى و انتى يا مدام حتنتخبى مين اقولها فلان  ..ترد بس يا مدام ده اخوان و احنا مشفناش منهم حاجة عدلة ..و بيقولك الى كان اخوان مش ممكن يبطل ده زى الادمان مجرد يبوس ايد المرشد خلاص ميقدرش يسيبهم  ...."احذر البوسة الاولى "

خدنى الكلام مع ام محمد و نسيت بنتى فى الحضانة ....اخدت تاكسى علشان متاخرش ...و طبعا قبل ما سواق التاكسى يسالنى رايحة فين سالنى حتنتخبى مين ؟؟؟ رديت قلت فلان .... بصلى بقرف كده و قالى عرفة يا مدام تنتخبى مين علشان تدخلى الجنة ...رديت بحده و قلتله اه عارفة بس مش حنتخبوا ...ليه بس مش عايزة تدخلى الجنة ..صرخت فيه و قلتله لا مش عايزة انا عايزة ادخل النار خلاص .. ليه بس كده يا مدام ده بيحس بالفقراء الى زينا ..ده بيوزع زيت و سكر و رز حتى شوفى ...ده غير ان عليه صنيه فراخ بالبطاطس تستاهل بقك  ...نزلت من التاكسى و هبدت الباب ورايا

روحت البيت و انا مش طايقة حد يسالنى السؤال ده ...فى حيرة من امرى و مش عارفة اختار ...حاسة ان محدش قد بلدى مع احترامى للكل ...حسيت زى الام الى مستخسره بنتها فى كل العرسان الى متقدمنلها ...بس حسيبها تعنس ؟؟؟

جبت بنتى و قلتلها بصى ..

انا عايزة رجل بحق و حقيقى ...يرفع راس المصرى  ...يبص على الناس الى تحت مش الى فوق بس ...يجيب حق الى ماتوا و الى عايشين ...رجل مواقف ..واحد مننا بيحس بهمنا ..تفتكرى انتخب مين يا سومى ؟؟ قالتلى حمدين صباحى يا مامى و من منطلق المثل القائل " خدو فالكم من عيالكم "انا متفائله بحمدين  صباحى ... بحترم الكل... بس  صوتى لحمدين صباحى

ام سومى  

لما الفاس تقع فى الراس

الايام الى احنا بنمر بيها اليومن دول من اصعب الايام الى مرت على الشعب المصرى ....بتتارجح مشاعرنا ما بين الامل و الياس ..والفرح و الحزن ..لحظات ترقب لحظات حماس .... سرحت بخيالى لو نجح كل مرشح ممكن يمشى ازى السيناريو علشان اظبط نفسى و ملبسش فى الحيط ما انا عندى بنت عايزة اربيها

لو فاز الفريق .....كونتينر من الصين فيه 90 مليون فرده جزمة قديمه و يقف الشعب طابور كل واحد ياخد بالجزمة على نفوخة و هو اقل من ذالك ..و ياخد بونبوناية و يروح علشان الريس مش فاضى وراه مسؤليات ...عايز يعمل بروفات على مليونيات التحرير علشان العابسية مكنتش بروفة كفاية ...علشان كل حاجة ترجع زى ما كانت زمان و احسن

السيد موسى ...ده بقى برنس لازم نقيم الاحتفالات فى فنادق 5 نجوم نوزع على الشعب سمون فيمه و كفيار و الحلو مارون جلاسيه بس مش حنطول فى الاحتفال علشان عم سيد بتاع السنترال الى فى اول الشارع محضرله طرابيزة فاخرة عليها الطفاية و فنجان القهوة سيجاره فى بقه التليفون على ودنه وعلشان يعمل اتصالاته علشان يظبطنا مع البلاد الصديقة ...عم سيد عامل حسابه و جايبله خط دولى مفتوح و دقائق مجانية

الدكتور مرسى ...الطالعة دى بتاعتى يا رجالة ...احلى صينية فراخ بالبطاطس فيكى يا مصر وعلى قصر الرياسة علشان ياكل و ينبسط و يعرف يفهم اوامر المرشد و ينفذها بخذفيرها ...اصل ساعة البطون تتوه العقول ....و انا بنفسى ححب على ايد سيده مصر الاولى و حكون دراعها اليمين فى الحمالات و المهرجانات الى حتقوم بيها ...مهرجان "الختان للجميع" ...حمله تستير البنات "لما بنتك تتم 9 سنين جوزها ان شالله للتنين" ..حملة القضاء على العنوسة "اقعدى مربعة المصرى حيتجوز اربعة "...فتوى جماع الوداع "بعد السر الالاهى ما يطلع ودع مراتك و اخلع" و بكده ننهض بمصر و تبقى فى اقل من 10 سنين احلى من افغانستان و ايران و نوصل بيها لبر الامان بما لا يخالف شرع الله ...ده حتى واحده صحبتى اقترحت نغير اسم مصر و نخليه مصرستان

دكتور ابو الفتوح ...و لانه رجل افعال ...و من منطلق استر اخواتى و بعدين افقوق لنفسى ...حنحشد الحشود نروح نحرر القدس  و بعد كده نشوف احنا حالنا

الاستاذ صباحى ... و لانه واحد مننا و كعادة المصرين فى الافراح و الاعياد حنروح المقابر و نترحم على الشهداء و نقولهم ان الثورة نجحت و جبنالكم الى حيجيب حقكم ...و لانه برضو واحد مننا و المصرين بيحتفلوا بالاكل حنروح كلنا نفطر فول و طعميه ...و الغداء كشرى و بالليل حفله سمر ...كان نفسى فى السيناريو الاخير ...فخورة انى انتخبت حمدين صباحى ..و كنت حبقى فخورة انه يبقى الرئيس ...بس مين عارف ربنا يجعلنا مخرج ان شاء الله

اما عن باقى المرشحين نشكركم على حسن تعاونكم و تفتيتكم للاصوات .....و اللاهى كنتم نسمه محسناش بيكم

مش حوصيكم على سومى فى حاله انى اختفيت فى ظروف غامضة

ام سومى 

 

عايز تبقى ريس عامل الناس كويس

انهارده بعد ما وصلت بنتى الحضانة استوقفتنى جمله قراتها على ميكروباص فى الشارع "عايز تبقى ريس عامل الناس كويس " جملة تبدو بسيطه بس بتحمل معانى كتير

و طول ما انا فى السكه لبيتى قعدت افكر فى الجملة دى و اربط بنها و بين الى بيحصل فى سباق الترشح للرياسه ...ابو اسماعيل ...ابو الفتوح ...ابو عز ....ابو نسمه ...و ابو جلنبو

و حملات كتير و بوستارات  ...و دعاية انتخابيه منها المحترم و منها المستفز ...كل واحد نازل ببرنامج و بيدى وعود ...و احنا كالعاده محتاسين و مش فاهمين حاجة

عنك مثلا حملة حازمون ....رش بوستارات فى شوارع مصر كلها ....على العربيات الى مش مؤيد قبل الى مؤيد ...فكرونى بالناس الى بتطلع الترام وترميلك الى بتبيعوا على رجليك غتاتة حتى لو قلتلهم انك مش حتشترى ....حنقعد الستات فى البيت قلنا و ماله اهى تتستت ...هنهد الاثار قلنا مفيش مانع اهو نوسع  المكان و نخلص من زحمة الخواجات ...الستات كلها تتنقب اهو نوفر المكياج و الكوافير ...بس كل ده كوم و موضوع جنسيه والدته ده كوم تانى ...لحد دلوقتى مش عارفين اذا كان حقيقى و لا لاء ...هو فى حاجة اسمها كده ؟؟؟وازارة الخارجية بتقول امريكية و كانت بتدخل و تتطلع بالباسبور الامريكانى ..و هو يقول محصلش ده تزوير...السعودية تقول ان السيدة الوالده دخلت تعمل عمره بالباسبور الامريكانى ...كدبين دى مؤامره ...امريكا زات نفسيهم يقولوا انها مواطنة امريكيه ...و هو يقول ابدا ده كلا فارغ ...و بعد ما تفرغ العالم العربى و اوروبا و امريكا و افرقيا و جنوب شرق اسيا و على راسهم موزانبيق للمؤامره على حازم ابو اسماعيل ...و تهنا احنا فى النص كالعاده

نطت فى دماغى  الجملة الميكروباصيه  "هو لما حضرتك تقعد الستات فى البيت يبقى كده بتعامل الناس كويس ؟؟ و لما تبوظ سياحة بلدك و تخرب بيت ملايين من المصريين الى دخلهم معتمد على السياحة تبقى بتعامل الناس كويس ؟؟؟ و لو طلع موضوع جنسية الوالدة ده صحيح و طلعت بتكذب تبقى بتعامل الناس كويس ؟؟

شاطرون ...و بعد و الحمد لله  ما المهندس خيرت الشاطر ربنا فك سجنة ...راح رازع بوستر يوسف- الى هو سيدنا يوسف عليه السلام- هذا العصر - الى هو سيادته -  ربنا فك سجنه و حيحكم مصر .... لا كفاره ان شاء الله و ربنا يجعلها اخر الاحزان ... و لااااااا ده هو باذن الله كده خارج عفو علشان حالته الصحيه المتدهوره على سبيل المثال لا الحصر ...شوية حاجات بسيطة كده ....فشل كلوى ..سكر ..ضغظ..تضخم فى القلب  ..الكبد تعبان شويه .. قرحه فى المعده ..شلل رباعى .....يبقى من اولها داخل على  ظهره زى المخلوع ...احب الى يجيب من الاخر ...هو لسه حيحكم 30 سنه و بعدها يخرج على ظهره

يعنى هو حضرتك لما يكون عندك كل الامراض دى و عايز تنزل سباق الرياسة تبقى عايز مصلحة البلد ...و لا زيك زى غيرك بتتجمل ..."عايز تبقى ريس عامل الناس كويس" و متستخفش بعقولنا ....ثم عيان و تعبان تنزل الشغل ليه

و فجأة و بعد طول انتظار ....مرشح الشعب ...عمر سليمان بتقولو مين ياولاد عمر سليمان ...فى اخر لحظة و بعد ما الشعب خرج فى مظاهرات ترجو سيادته بالعدول عن قرار عدم الترشح .. و العيال تعيط و الستات تلطم ...و الرجالة تولول ...و مليونيات ...حن قلب الجنرال ...و قام قايل انا مش ممكن اكسف الشعب ابدا ...و لم حوالى 140 توكيل او اكتر بس حرصا على مشاعر باقى الزملة مرضاش يقدمهم كلهم ....و هنا يستوقفنى حديث الشيخة الشريفة العفيفة ماجدة ...الست قالت ان فى 2012 حيقوم زلزال مروع و حيموت فيه ناس كتير ...كنا فكرين الست بتقول اى كلام او انها مكنتش متغطية كويس ...بس اهو الكلام الى بتقوله بيتحقق ...و بالمناسبة السعيدة دى ...لو لا قدر الله نجح الجنرال ...و صيتكم بنتى لو رحت فى الوبى و لو رسيت على السجن انا بحب حلاوه حلوانى بالفزدق

يا جنرال برنامجك ايه ....الصمت الرهيب ؟؟ فين البرنامج حتعمل فينا ايه و لا عملهلنا مفاجاه زى الترشح ...اسلوب التعتيم و المخابرات ده معدش يجى منه "عايز تبقى ريس عامل الناس كويس " و متعيشناش فى الضلمه تانى

معنديش كلام تانى اقوله غير لينا رب اسمه الكريم

ام سومى

نحن محتاسوووووون

زى اليومين دول السنة الى فاتت كتبت اول مقال ليا حد يقرأة و كان بعنوان انا مبقتش فاهمه حاجه و كانت المفجأه انى لقيت ناس كتير اعرفها مش فاهمة حاجه زيى   ....ده طمنى شويه بس قررت انى احاول افهم ...ابتديت اتابع الاحداث و اشارك فيها متمسكه بمكانى على الكنبه ...و بقينا انا و اصحابى لما نتقابل او نتكلم بدل ما نتكلم فى الاكل و شغل البيت الى مبيخلصش و العيال و قرفها بقينا بنتكلم فى السياسه ...ربنا فتح علينا من و سع و بقينا بنتكلم فى امور البلد و نطرح اقترحات و كل واحد بيقول رأيه و نعلق على الاحداث و نتناقش و نتخانق و كده يعنى

كلنا نزلنا الاستفتاء ...و بعدها الانتخابات ...و مارسنا نشاطنا السياسى عبر الفيس بوك و التليفون من موقعنا على الكنبه ...و سرعان ما اختفى كل ده بسبب ان مفيش جديد و مفيش حاجه بتتغير ...فرجعنا نتكلم فى العيال و الطبيخ و الذى منه تانى ...و اصبح الكلام فى السياسة و احوال البلد ماده للضحك و السخريه ...شفتوا النائب الى طلع عليه بلطجيه و ضربوه ....اسكتى يا اختى مش طلع الكلام ده كله كدب ده طلع انه كان بيعمل عمليه تجميل فى مناخيره و بينفخ شنبةعلشان داخل ستار اكادمى السيزون الجاى  و احرج يقول كده لحسن يكفروه....و الا النائب الى عايز يلغى الانجليزى من المناهج ....ما الراجل برضو عنده حق اصل الجماعة بتوع اوروبا و الدول المتقدمة اشتكوا من تشوية اللغه الانجليزية.....منتى عارفه بقى المصرين لازم يعملوا شوية تعديل فى اللغه اوول انجلش اوول زا تايم ....شفتى مجلس الشعب ابارح ...ااه شوفته ده انا مت من الضحك لذيذة اوى القناة دى انا بنام عليها كل يوم اهو الواحد يفرفش قبل ما ينام ....

اما  اللقاء الاخير بتاع حازم ابو اسماعيل كان خرافة ...و اللهى بيقول ايه ؟؟؟ كتر خيره الراجل حيستت الستات كلها ...و اهو ليلتفتوا لشغل البيت و العيال بقى ....و حيحجب المسحيين علشان ميبقاش فى فرق بينا علشان الفتنه و كده ..و حيهد الاثار علشان حرام و منها يوسع المكان و حيعمل مكانها جنينه عامة و اهو نخلص من السياحه و قرفها .... اصله مبيحبش الاختلاط كل واحد يقعد فى بلده مش نقصين زحمة و مشاكل

اما محاكمة المخلوع ابارح كانت مسخره شوفتيه و هو داخل المحكمة بنضاره الشمس ...اه ما هو علشان طول الليل كان بيعيط فعنيه وارمة ...بيعيط ليه؟؟؟...دخلوا عليه الدكتره لقوه بيعيط يجبولوا ساندوتش فول يكله و يعيط ...عصير يشربه و يعيط.... ببسى و العياذو بالله يشربها و يعيط ...اتارى الراجل الى بيصبغله مجاش و مكنش عارف حيروح المحكمة ازاى ...بس الله يباركلها ماما سوزان بعتت جابتله حنه سودانى و عملتهالوا علشان يبطلوا حجج و ميقلوش ان مسرف و بيضيع فلوس البلد ...اهو الى بيصرفة فى الطياره الخاصة الى بتنقله ماما سوزان بتوفره فى الصبغه ...ست مدبره صحيح

و من محاكمة المخلوع الى انتخابات الرياسه ...حوالى 1000 مرشح ...بس ؟؟؟ تخيلوا 1000 مرشح بس ...مش ممكن الاختيارات كده محدوده اوى ...مش ممكن هما عايزين يفرضوا علينا ناس بعينها كده ليه ...انا اعرف بلد كان فيها عدد المرشحين للرياسة مليون مرشح علشان الشعب ياخد راحته و يختار الانسب ...مش تقلولى 1000 مرشح دول يعملوا ايه دول ...لا لا لا عدد محدود جدا

و لا حمالات الدعاية ...حاجة تفرح حقيقى ...على سبيل المثال لا الحصر....حمله حازمون ...ايوه كده البلد محتاجة حزم ...تنزل على عربيتك تلقى ملطوع عليها حزم ....الشجره الى قدام بتكم ملطوع عليها حزم ...العيال فى الشوارع مسكين اعلام عليها حزم ...نداءات على الفيس بوك تطالب بالحزم ..فيها ايه يا اخى لما تمسك بوستر الحزم و تقف وقت طلوع الموظفين فى عز الزحمه فى ناحه الشمس اهو ينوبك ثواب ...و بالمره تتشمس و تطلع البرغيت و تستفيد من فيتامين د و اشاعة الشمس الضاره و تقوى عظامك الى بوظتها الببسى لعن الله شاربها و شاريها و بايعها و صانعها و جالسها و واقفها

و خد عندك حمله شاطرون ...و سالمون ...و صابحون ...و فاتحون ...و شافقون ...عامرون ...و متخلفون ...و مستهبلون ...و احنا فى وسط كل ده محتاسون ...و لايصون ...و متبهدلون ...و متشحورون

الله يجازى الظالمون ...و المفسدون ... والكاذبون ....... و يرزقنا بالمنصفون ...العادلون ....الوطنيون

اخوانى و اخواتى المش فاهمون ....معايا فى حمله محتاسون و لا مش فاضيون

للمشاركة من فضلك حمل   برنامج الام ام يو على جوالك و ابعت الفيديو على رغاوى صابون

ام سومى